BACCALAUREI ILICETANI INSIGNIES

[Pag. 150] ANDREAS FULLONICENSIS inter Baccalaureos insignies primo numeratur, de eo enim in Serie professorum Coenobij Iliceti sic habetur: Fr. Andreas Fullonicensis sacrum Religionis Habitum octavo Chalendas Quintilii Anni Dom. 1577 et suo tempore emisit professionem, evasit egregius verbi Dei Concionator: de eo nescimus quid amplius dicere possumus, satis namque nobis videtur dixisse dum egregium concionatorem eum fuisse verbi Dei retulimus. Inter vivos erat Anno Dom. 1600.

IOANNES BAPTISTA PETRUCCIUS Anno 1589 Habitum Eremitanum suscepit et sequenti professionem emisit; de eo in Serie Alumnorum Coenobij S. Martini sic loquitur: Hic eo doctrinae ascendit, ut apud Geminianenses Regentis sit perfunctus munere, sed cum paulo post miserabili caecitate fuerit percussus, quam adhuc patienter sustinet, nullo alio, praeter Martinianum eum decorari licuit Magistratum. Qua non obstante infirmitate optime Coenobium gubernavit. Obijt die 13 Septemb. 1631.

ANGELICUS VECCHIUS Anno 1588, die 6 Septemb., Religionem ingreditur; nos quamplurimum ei debemus, dum per suas manus Habitum Eremitanum recepissemus cum esset Vicarius Generalis Congregationis; de ipso in supradicta Serie Coenobij S. Martini haec scripta sunt verba: Fr. Angelicus Domini Sylvis de Vecchis, ante Oratius Religioni An. salv. 1588, die 6 Septemb. nomen dedit Burghesio Priore, cum autem per omnes sodalitii sui precurrisset honores diem clausit extremum An. 1626, 25 Iulii.

MICHELANGELUS SENENSIS Gramaticus, Theologus Moralis ac Verbi Dei Concionator eximius; satis ei tenemur, eo quia noster in supradictis scientijs fuerit Magister; de ipso in supradicta Serie sic loquitur: Fr. Michelangelus Magistri Lucii Sen. Religionem advenit 1595, die 25 Iulii Hyppolito Pannalfusio Rom. tunc Congr. Generili Vicario excipiente, sequenti vero An. professus est; vivit adhuc inter praecipuos nostrae Congr. Concionatores et Vallisasprae Prior. Obijt 30 Nov. 1646.

NICOLAUS BROCCOLUS a Sancto Geminiano, eo fuit Fratribus ac Patribus Congregationi Ilicetanae charus, ut semel et iterum eum ad Apicem Vicariatus Generalis eorum Congregationis assumpserint, sed non completo primo anno sui Magistratus, quando denuo electus fuit, quod mors inimica eius vitae, ad se eum traxit lachrimatus ab omnibus suis Confratribus, Concivibus et Subditis; fuit summe virtutae praeditus, optimusque Concionator, et Religiosus maxime exemplaris. Obijt 1629.

SERAPHINUS VENTURIUS olim Octavius Domini Persij; etsi inter Concionatores primum non obtinuit locum, fuit tamen optimae Oeconomiae; plura nostrae Ilicetanae Congregationis Coenobia prudenter magnoque eorum incremento gubernavit. Fuit Alumnus Monasterij S. Martini Sen. quod summa cum prudentia administravit; ad gubernium Ilicetani Coenobij assumitur, a quo vix assolutus fuit, completo biennio, quod Senis vitam cum morte commotavit An. Dom. 1529 die 7 Octobris.

VINCENTIUS GUERRATIUS a Castro Franco Florentinus cunctis praeditus virtutibus; Coenobia permulta nostrae Congregationis exacte gubernavit, non minusque totam Congregationem uti Vicarius Generalis; vix onus deposuit quod mors inimica e vivis rapuit, lachrymatus ab omnibus suis consodalibus, qui tamen consolati fuere ob optima spe eius Nepoti Baccalaurei Fratris Anselmi Guerratij, qui iam iam principaliora Monasteria Congreg. gubernavit; Obijt Vincentius Florentiae An. 1633.

DOMINICUS REGIUS LOMBARDELLUS post emissam professionem in primis Italiae Academijs Religionis operam studijs dedit, quibus absolutis, et si Lauream Magistralem non obtinuit, hoc inimica mors impedivit. Fratrem suum Germanum Petrum Franciscum ad Religionis ingressum exortavit, quod et fecit, de eo multa dicenda essent, sed innixi Adagio illo: Lauda post mortem, magnifica post consumationem, quia etiam vivit, nil aliud de eo dicamus. Obijt Dominicus noster die 27 Iun. 1643.