OECONOMICI ILICETANI

[Pag. 151] Mirae Oeconomiae multi fuere Viri in nostra Ilicetana Congregatione, primusque ante oculos nubis occurrit Io: Baptista Benincasa Seraphicae Catharinae consanguineus, cuius diligentia ac desteritate multa pro Coenobio Ilicetano acquisivit stabilia multaque aedificia in ipso Coenobio incepit et perfecit, maximeque Ilicetanum Templum amplificavit; vivebat Anno 1314 et multoties fuit Prior supradicti Monasterij Ilicetani, ut videre est in Serie Priorum pag. 20.

Liberatus Romanus Ilicetanus cui Plumbea Sigilla Sanctae Sedis a Pio II custodienda data sunt, sui amoris erga sacram Domum semper singulare praebuit argumentum; multa pro Coenobio et Congregatione Ilicetana a Summo Pontifice impetravit, multaque suo opere et industria acquisivit nostrum Ilicetanum Monasterium; ita ut dignissimum filium et Alumnum se se illius sacrae Domus praebuit. Erat in humanis An. 1440, charus Pontifici et benemeritus Religionis et suae Congregationis.

BARTHOLOMAEUS DE PTOLOMAEIS tantae Oeconomiae fuit, ut quam pluries Prioratum Ilicetanum habuerit, multa aedificia patravit et praecipue Turrem pro Campanis, quarum una ab Episcopo Sen. emit; Sacellum B. Ioannis Incontri incepit; ab Abbate S. Galgani pro Collegio Ilicetano, aliquibus cum pactis, recepit Ecclesiam Sanctissimae Trinitatis extra Portam Laterini; ut Romam petere ad gravissima pertractanda negocia Senis discessit, in via infirmatur, redijt ad Congreg. et mortuus est 1470.

LACTANTIUS PICCOLOMINEUS aeternae memoriae gloriosis facinoribus nomen suum commendavit, nam tempore quo praefuit Ilicetanum Monasterium construere curavit testudo Capituli, in quo acta Synodalia et Capitulum de Culpis agitur, item Dormitoria, et super Triclinium et super dictum Capitulum et Porticum iam inceptum a Septentrionali parte; quibus Fabricis, ultra multa alia operata, Lactantius noster se se gloriosum ostendit, et in optima Oeconomia versatum esse vivebat An. 1508.

SERAPHINUS DE FERRIS a Castellina in ditione Florentina quantae Oeconomiae fuit ex eo argumentari potest quod quatuor Prior Iliceti extitit, sub quo Magistratu multa operavit pro Coenobio Ilicetano, Claustra, quae nova dicuntur, ipse primum edificare curavit, a Burghesio Petruccio multa emit nemora, fuit etiam Seraphinus Reformator Generalis in Tuscia, Vicarius Generalis Congreg. et tandem Prior Monasterij S. Augustini in Urbe Romae Anno 1514 inter vivos reperiabatur.

AEGIDIUS PICCOLOMINEUS et si neque Vicarius Generalis Congregationis nec Prior Iliceti extitit, praefuit tamen in alijs Coenobijs; maximam Oeconomiam tunc ostendit, quando de his quae ei Religionem nostram elargebatur omnia ad honorem Dei in sacram superlectilem impendebat; Senis in Sacrario de Aegidio nostro reperitur inter alia Pluviale Brocchati coloris rubei; erat Supprior in Monasterio sancti Martini Senarum quando e vita discessit, et hoc fuit die 3 Octobris Anni 1601.

PETRUS FRANCISCUS PIENTINUS maximae oeconomiae fuit, ipse enim erat filius Coenobij sancti Martini Senarum, per multum insudavit plurimumque defetigavit ut fabrica tum Ecclesiae tum Monasterij ad ultimum perduceretur finem; plurima procuratoria instrumenta sunt in Archivio dicti Coenobij S. Martini in quibus apparet oeconomia nostri Pientini, cum omnia negocia Monasterij supra suis humeris innixa essent. Octuaginta et quinque annos habens mortuus est anno 1603, die 31 Martij.

HIERONYMUS LANDUCCIUS, et si numquam Prior, tamen suam optimam Oeconomiam ostendit in rebus Monasteriorum administrandis uti Procurator; ipse enim ex pecunijs, quae ei pro sua benignitate Religio relaxabat, extruere fecit Columbarium in Praedio Rapolani nuncupato Fonte vecchia. Turribulum cum Navicula argentea pro Ecclesia fieri mandavit; obiens summum reliquit aes, quo maior pars Cubiculorum Coenobii S. Martini, in quo Alumnus erat, constructa est.